Алматының интерактивті қала құрылысы картасы: не атқарылды

2021 жылғы 17 наурызда Алматы қаласын дамыту мәселелері жөніндегі кеңесте Мемлекет басшысы бұл салада барынша ашықтықты қамтамасыз ету үшін Алматы әкімдігі интерактивті қала құрылысы картасын әзірлеуі қажет екенін атап өтті. Тапсырманың орындалу барысы туралы қалалық жоспарлау және урбанистика басқармасы мәлімдеді.

Басқарма қалада салынып жатқан нысандарға мониторинг жүргізудің интерактивті картасы жасалғанын хабарлады.

«Алматы қаласының геопорталы негізіндегі интернет-ресурс ҚР Президентінің тапсырмасына сәйкес әзірленді», — деп атап өтті ведомство.

Интерактивті карта көппәтерлі тұрғын үй кешендерін (КТК) салу жобалары бойынша барлық қажетті ақпаратты қамтиды: жобаның атауы, құрылыс салушы, кадастрлық нөмір, эскиздік жобаны келісу туралы мәліметтер, берілген сәулет-жоспарлау тапсырмалары, құрылыстың басталу және пайдалануға берілу мерзімдері, авторлық/техникалық қадағалау, құрылыс ауданы, қабаттылық, пәтер саны, құрылыс паспорты.

Ресурс арқылы нысандардың орналасқан жерінің жергілікті жағдайларымен (қолданыстағы құрылыс, гидрография, абаттандыру), сондай-ақ аумақты пайдалану шектеулерімен (қызыл сызықтар, су қорғау белдеулері мен аймақтары, Бас жоспар, егжей-тегжейлі жоспарлау жобасы, рекреациялық аймақтар) танысуға болады.

Қызмет дамыған сайын интерактивті картада салынып жатқан әлеуметтік нысандар (мектептер, балабақшалар, емханалар), жол жұмыстары, жеке тұрғын үй құрылысы (ЖТҚ) жобалары туралы мәліметтер көрсетіледі.

Сонымен қатар қалада Алматы қаласының сәулеттік келбетін қалыптастыру және қала құрылысын жоспарлау қағидалары әзірленді. Қазір олар бекіту кезеңінде.

Басқарманың атап өтуінше, жаңа қағидалар қала орталығындағы құрылысты қатаң реттейді.

Атап айтқанда, ерекше құқықтық режим қала құрылысын ерекше реттеу аймақтарында мынадай шектеулер белгілейді:

• Осы қағидаларда белгіленген биіктік регламентіне сәйкес рұқсат етілген қабаттылық;

• Құрылыс тығыздығы мен құрылыс коэффициентіне қатысты шектеулер;

• Ғимараттар мен құрылыстар қасбеттерінің сәулеттік шешімдері;

• Ғимараттар мен құрылыстарды функционалдық мақсаты бойынша пайдаланудың рұқсат етілген түрлері;

• Тарих және сәулет ескерткіштерінің қорғау аймақтарындағы құрылыс;

• Ғимараттар мен құрылыстардың пішіндері мен көлемдері;

• Көше жиһазы мен шағын сәулет нысандарын пайдалану;

• Аумақты абаттандыру және көгалдандыру;

• Қолданыстағы ғимараттар мен құрылыстарды пайдалану және күтіп-ұстау;

• Маңдайшалар мен жарнама конструкциялары;

• Шағын сәулет нысандарын және стационарлық емес сауда объектілерін пайдалану және орналастыру;

• Инженерлік коммуникацияларды төсеу және жөндеу;

• Тарих және сәулет ескерткіштері санатына жатқызылған ғимараттар мен құрылыстарды бұзуға тыйым салу.

Алматы қаласының қала құрылысын ерекше реттеу аймақтарына жататын аумақтары:

• Қаланың Бас жоспарымен бекітілетін шекаралар шегіндегі тарихи орталық;

• Тарих және сәулет ескерткіштерінің аумақтары мен олардың қорғау аймақтары;

• Алматы қаласының табиғи-рекреациялық аумақтары;

• Алматы өзендерінің су қорғау белдеулері шегіндегі аумақтар;

• Тау бөктеріндегі және таулы аумақтар;

• Жалпы қалалық маңызы бар магистральдық көшелерге іргелес, орталық бөлікті қалалық тораптармен немесе тораптарды өзара байланыстыратын учаскелердегі магистраль бойындағы аумақтар, оның ішінде қалаға кіреберіс тораптар;

• Қоғамдық кеңістіктер аумақтары;

• Ерекше геологиялық жағдайлары бар аумақтар;

• Тұрғын үйлердің аула аумақтары.

Сонымен қатар Мемлекет басшысы Қасым-Жомарт Тоқаев ескі үйлерді жаңғырту және қаланы көгалдандыру қажеттігін атап өтті.

Жаңғырту бағдарламасы аясында 700-ден астам тозығы жеткен үйді бұзу жоспарланған. Бұған дейін Алматы қаласында 2012-2015 жылдары жүргізілген апатты үйлерді бұзудың пилоттық бағдарламасы аясында 56 тозығы жеткен үй бұзылып, 63 көппәтерлі тұрғын үй салынған.

«Қалада жағдайы адамдардың өмірі мен денсаулығына қауіп төндіретін ескі құрылыстар бар. Мұндай тұрғын үй қорын жаңғырту ескі үйлердің орнына жаңа, функционалды әрі заманауи нысандар салуға мүмкіндік береді.

Бұл ретте бұзылған тозығы жеткен үйлердің аумағында тұрғын үйлермен қатар халыққа қызмет көрсететін жаңа нысандар салынып, жаңа желілер жүргізіліп, саябақтар, бульварлар, гүлзарлар мен қоғамдық кеңістіктер абаттандырылады», — деп хабарлады «Алматы» ӘКК.

Бұдан бөлек, 2021-2025 жылдарға арналған тұрғын үй қорын жаңғырту бағдарламасы іске қосылды. Оның аясында 708 тозығы жеткен тұрғын үйді бұзып, 683 тұрғын үй салу жоспарланған. Бағдарламаны жүзеге асырудың екі тетігі көзделген: «Алматы» ӘКК» АҚ мен жеке инвестор іске асыратын жобалар; мемлекеттік қаржыландыру арқылы жүзеге асырылатын жобалар. Бұған дейін Алматыда қандай жаңа саябақ аймақтары пайда болатыны және оларды қала тұрғындарымен қалай талқылайтыны хабарланған.

Дереккөз: https://www.inform.kz