Сюнъань: Қытайда болашақтың теңдесі жоқ мегаполисі бой көтеруде

Пекиннен шамамен 100 шақырым жерде, «Солтүстік Қытайдың інжу-маржаны» атанған Байяндянь көлінің жағасында ашық даланың ортасында болашақ қалалардың үлгісіне айналуы және құрылыс пен қала құрылысы технологияларын сынау және дамыту алаңы болуы мүмкін қала салынып жатыр.

Қытай құрылыс ауқымымен жиі таңғалдырады. Алайда мұнда құрылыс алаңдары ондаған шаршы шақырымға созылған. Жерасты коммуникациялары мен жолдар, инженерлік құрылыстар, тұрғын және кеңсе ғимараттары бір уақытта салынуда. Қалада өмір сүру мен жұмыс істеуге қолайлы жағдай жасау үшін ол заманауи урбанистиканың барлық жетістігін ескере отырып жобаланған. Пекиннен орталық мемлекеттік мекемелердің бір бөлігі мен ірі компаниялардың кеңселері осында көшеді деп болжануда.

Сюнъаньды жиі әлемге әйгілі Шэньчжэнь арнайы экономикалық аймағымен және Шанхайдағы аса заманауи Пудун ауданымен салыстырады. Сюнъань қаласының құрылысы 2017 жылы ҚХР төрағасы Си Цзиньпиннің жеке бастамасымен басталды. 2018 жылы «Хэбэй провинциясындағы Сюнъань ауданының дамуының бас жоспары» бекітілді. Ол ауданның 2035 жылға дейінгі дамуын айқындайды.

Дамыған инфрақұрылымы мен жылдам көлік желісі бар «жасыл» қала құру, озық технологияларды енгізу, сумен жабдықтау желісін жақсарту және энергия тұтыну құрылымын оңтайландыру жоспарланған. Яғни ешқандай өз бетінше әрекетке жол берілмейді: барлық құрылыс бас жоспарға қатаң сәйкес жүргізіліп, билік тарапынан мұқият бақыланады.

2021 жылғы деректер бойынша қалада 1 млн-нан астам адам тұрған. Мұнда бизнес дамытуға және өмір сүруге қажетті жағдайлардың бәрі жасалған. Қазір Сюнъаньда шамамен 1,4 миллион тұрақты тұрғын бар. Жаңа инновациялық орталықтың жалпы халқы 3 млн адамға жетеді. Пекин тұрғындарының да осында көшуі күтіледі. Қала құрылысына шамамен 118 млрд АҚШ доллары салынған.

2020 жылы қалада шамамен 4 мың кәсіпорын мен фирма тіркелген. 2022 жылғы қыркүйекке қарай қалаға 400 миллиард юань (шамамен 57 миллиард доллар) жеке капитал инвестицияланды.

Sinochem Group химия корпорациясының, China Mineral Resources Group шикізат компаниясының штаб-пәтерлері, сондай-ақ China Huaneng Group электр энергиясын өндіретін кәсіпорны салынып жатыр. Негізгі назар инновацияның ең заманауи салаларын дамытуға аударылған.

Мұнда аэроғарыш, телекоммуникация және басқа инновациялық фирмалардың филиалдары мен технологиялық орталықтары ашылып үлгерді. 2025 жылға қарай Пекиндегі бірнеше университеттің серіктес филиалдары ашылады. Әрине, қала Пекинмен жоғары жылдамдықты теміржол және автомагистраль арқылы байланысқан.

Жаңа инновациялық аудан орналасқан Хэбэй провинциясы 2023 жылы Пекин–Тяньцзинь–Хэбэй өңірінің көлік желісін үйлесімді дамыту үшін көлік құрылысына 103,5 млрд юань (шамамен 15,4 млрд АҚШ доллары) инвестициялауды жоспарлап отыр.

Сюнъань қаласын құру тұжырымдамасымен танысқанда, мұның әлемде баламасы жоқ мүлде жаңа жоба екенін түсінуге болады. Тұжырымдама үш қаланы: жер бетіндегі, жер астындағы және «бұлттағы» қаланы құруды көздейді. Жерасты қала — негізгі жолдардың астымен өтетін инженерлік тоннельдер жүйесі.

Ол арқылы су және электр желілері, байланыс кабельдері және басқа коммуникациялар жүргізіледі. Мұнда жүк пен тауарларды автоматтандырылған түрде жеткізуге арналған арнайы дәліздер де орналасады. «Бұлттағы қала» дегеніміз — жерүсті және жерасты қалаларымен қатар салынып жатқан цифрлық Сюнъань.

Ол инфрақұрылым мен технологиялық жүйелерді басқарудан бастап тұрмыстық виртуалды қызметтерге және цифрлық юаньды кеңінен енгізуге дейін өмірдің барлық саласын қамтиды. Қазірдің өзінде құрылысшыларға және қаладағы басқа қызметкерлерге еңбекақы цифрлық юаньмен төленеді.

Жасанды интеллект пен бет-әлпетті тану жүйелерінің негізінде дүкендерде пластикалық немесе виртуалды карталарды қолданбай-ақ төлем жасауға болады.

Сюнъань тұрғындардың медициналық мекемелерге, білім беру және мектепке дейінгі ұйымдарға, сондай-ақ басқа да күнделікті қызметтерге бес минуттық жаяу қашықтықта қол жеткізуін қамтамасыз ететін «бес минуттық аудан» қағидатымен салынып жатыр.

Қоғамдық көлік қалалық қозғалыстың 90%-ын қамтиды деп жоспарланған. Автоматтандырылған электр автомобильдері бейнекамералар мен қозғалысты басқарудың күрделі жүйесімен бірге жұмыс істейді. Бұл қаладағы көлік кептелістерін жоюға мүмкіндік береді.

Экология мен қоршаған ортаны ұйымдастыруға ерекше көңіл бөлінуде. Сюнъань «Қытайдың жасыл дамуының» үлгісі болуы тиіс. Қаланың дамуы басталған алғашқы 2017 жылдың өзінде мұнда шамамен 14 млн ағаш пен бұта отырғызылды. Қоршаған ортаны ластаған ауыл шаруашылығы кәсіпорындары жойылды.

Атмосфераға шығарындыларға қойылатын аса қатаң талаптар «лас» өндірістер ашуға мүмкіндік бермейді. Қала тұтынатын энергияның жартысына дейін жаңартылатын көздерден өндіріледі.

Жалпы, Сюнъань Қытай Коммунистік партиясының болашақ қалаларға қатысты көзқарасына сай технологиялар мен тұжырымдамаларды сынайтын алаңға айналады деп күтіледі. Даму үшін қала, адам үшін қала. Әлемде әзірге мұндай қаланың баламасы жоқ.

дереккөз: svpressa.ru