Қазақстанда құрылыс материалдары мен бұйымдарының 77 түрін міндетті сертификаттау енгізіледі

Қазақстанда құрылыс материалдарына қатысты жаңа техникалық регламент қабылданды. Алдыңғы регламент 13 жыл бұрын қабылданған және көптеген маңызды мәселелер бойынша нақты талаптарды қамтымаған.

ҚР Индустрия және инфрақұрылымдық даму министрінің 2023 жылғы 9 маусымдағы № 435 бұйрығымен «Ғимараттар мен құрылыстардың, құрылыс материалдары мен бұйымдарының қауіпсіздігі туралы» техникалық регламент бекітілді.

Құжат ресми жарияланған күнінен бастап алты ай өткен соң (2023 жылғы 19 желтоқсанда) күшіне енеді.

Техникалық регламент Қазақстан Республикасы аумағында ғимараттар мен құрылыстардың, құрылыс материалдары мен бұйымдарының бүкіл өмірлік циклі кезеңдерінде қолдануға және орындауға міндетті ең төменгі қауіпсіздік талаптарын белгілейді.

Сондай-ақ ол оларды сәйкестендіру қағидаларын, сәйкестікті бағалау қағидалары мен нысандарын, соның ішінде өнімді айналымға шығару кезіндегі талаптарды, құрылыс материалдары мен бұйымдарын таңбалау және таңбаны түсіру қағидаларын анықтайды. Бұл Қазақстан Республикасы аумағында өнімнің еркін қозғалысын қамтамасыз етуге бағытталған.

Күшіне ену күніне дейін Үкіметтің 2010 жылғы 17 қарашадағы № 1202 қаулысымен бекітілген бұрынғы «Ғимараттар мен құрылыстардың, құрылыс материалдары мен бұйымдарының қауіпсіздігіне қойылатын талаптар» техникалық регламентінің күші жойылады.

«Алдыңғы құжат 13 жыл бұрын қабылданған. Онда стандарттау жөніндегі құжаттардың тізбесіне, құрылыс материалдары мен бұйымдары нақты қандай талаптарға сәйкес болуы тиіс екеніне, қандай әдістермен сынақтан өткізілуіне және олардың міндетті сертификатталуына қатысты нақтылық болмады. Соның салдарынан жекелеген позициялар бойынша сәйкестікті міндетті растауды қолданбауға мүмкіндік берілді», — деп атап өтті ИИДМ.

Жаңа техникалық регламент оның 4-қосымшасында көрсетілген құрылыс материалдары мен бұйымдарының 77 түрін (гипс, әк, цементтің барлық түрлері, клинкерлер, кірпіштер, малтатас, қиыршықтас, ұсақталған тас, желімдер, сылақтар, төсемтастар, гранит, құрылысқа арналған тастар, әктастар, тақтатастар, орталық жылыту радиаторлары мен олардың бөлшектері және басқалар) міндетті сертификаттауды енгізеді.

Техникалық регламенттің 5-қосымшасында аталған құрылыс материалдары мен бұйымдарының 54 түріне (мәрмәр, травертин, гранит, битум және асфальт, шатыр жабынқыштары, кірпіштің жекелеген түрлері, құрылыс әйнегі мен шыны бұйымдары, шыны талшық, ағаш және кесілген ағаш материалдары, тақталар, панельдер, есіктер, бұрыштық профильдер, шыбықтар және металл конструкциялар түріндегі металл бұйымдар, құм және басқалар) сәйкестікті міндетті декларациялау қолданылады.

Сәйкестікті міндетті растауға арналған құрылыс материалдары мен бұйымдарының сипаттамаларына (қасиеттеріне) қойылатын қауіпсіздік талаптары техникалық регламенттің 1-қосымшасында аталған өнімге арналған ұлттық және мемлекетаралық стандарттармен айқындалады. Оларға 210 ұлттық стандарт (ҚР СТ) және 335 мемлекетаралық стандарт (ГОСТ) кіреді (техникалық регламенттің 2-қосымшасы).

Құрылыс материалдарын зерттеу (сынау) және өлшеу әдістері техникалық регламенттің 3-қосымшасында көрсетілген 196 ҚР СТ және 268 ГОСТ стандартында тікелей бекітілген.

Құжат өнімді сертификаттаудың 10 схемасын (Сәйкестікті бағалау қағидаларына сәйкес) және сәйкестікті декларациялаудың 6 схемасын көздейді.

Техникалық регламентте сонымен қатар мыналар тікелей белгіленген:

• зертханалар сәйкестікті растау органдарымен немесе басқа өтініш берушілермен шарт негізінде өнім сынақтарын, зерттеулерінің (сынақтарының) нәтижелерін және өлшеулерді фотоға және (немесе) видеоға түсіреді;

• цемент өнімдерін сертификаттау Қазақстан Республикасының ҚР СТ 3361 «Цементтер мен портландцемент клинкерінің сәйкестігін растау тәртібі» ұлттық стандарттау құжатына сәйкес жүргізіледі;

• табиғи тастан жасалған бұйымдарды сертификаттау Қазақстан Республикасының ҚР СТ 3619 «Табиғи тастан жасалған бұйымдар. Жалпы техникалық шарттар» ұлттық стандарттау құжатына сәйкес жүргізіледі.

дереккөз: https://inbusiness.kz