Жиі іздейді

Керегін таппадыңыз ба? Бізге жазыңыз
Сала жаңалықтары

Forma 3D-де сканерлеуден CAD-модельге дейін: Artec Leo көмегімен өндірістен алынған сорғы жұмыс дөңгелектерінің кері инженериясы

Австралияның Квинсленд штатында орналасқан Condamine Drilling өңір бойынша бұрғылау, суару жабдықтарын жеткізу және сорғыларға қызмет көрсету жұмыстарын атқарады. Осы саладағы көптеген кәсіпорындар сияқты, компания жылдар, тіпті ондаған жылдар бойы пайдаланылатын ауыр сорғы жабдықтарына сүйенеді. Уақыт өте келе сорғы бөлшектерінің бастапқы инженерлік сызбалары жоғалып, өндірушілер қосалқы бөлшектерді жеткізе алмайтын болды.

CAD.kz редакциясы

Мазмұны

Сканерлеуден CAD-модельге дейін: Artec Leo көмегімен өндірістен алынған сорғы жұмыс дөңгелектерінің кері инженериясы

Міндет

Қалақшаларының геометриясы күрделі және беттері шағылысатындықтан сканерлеу қиын, өндірістен алынған сорғы жұмыс дөңгелектерінің дәл CAD-модельдерін жасау.

Шешім

Artec Leo, Artec Studio, SOLIDWORKS.

Әр жұмыс дөңгелегінің тұйық 3D торы жасалды. Оны CAD жүйесінде қайта модельдеп, кейін құю өндірісінде қоладан құюға болатын еді. Қосалқы бөлшектер қайтадан пайдалануға берілді, ал тапсырыс берушіде енді әр ақау кезінде қолдана алатын цифрлық үлгі бар.

Неліктен Artec 3D?

Artec Leo сканерінің сымсыз, қолмен ұстауға ыңғайлы құрылымы және нақты уақыттағы кері байланысы шеберхана жағдайында нысанды жан-жағынан сканерлеп, деректерді өңдеуге кіріспей тұрып оның толық қамтылғанына көз жеткізуге мүмкіндік береді. Leo құрылғысының ажыратымдылығы, дәлдігі мен жылдамдығы оны кері инженерияны жедел орындауға да қолайлы етеді: сканерді нысанды жылжытпай және дәлдікті жоғалтпай пайдалануға болады.

image

Forma 3D маманы Artec Leo көмегімен жұмыс дөңгелегін цифрлық форматқа көшіруде

Австралияның Квинсленд штатында орналасқан Condamine Drilling өңір бойынша бұрғылау, суару жабдықтарын жеткізу және сорғыларға қызмет көрсету жұмыстарын атқарады. Осы салалардағы көптеген кәсіпорындар сияқты, компания да жылдар, кейде ондаған жылдар бойы пайдаланылатын ауыр сорғы жабдықтарына сүйенеді. Уақыт өте келе сорғының кейбір бөлшектеріне арналған бастапқы инженерлік сызбалар жоғалып, өндірушілер қосалқы бөлшектерді жеткізе алмайтын болды.

Баламалы шешім іздеген Condamine Forma 3D компаниясына жүгінді. Компания автомобиль өнеркәсібі, өндіріс, құрылыс және басқа салаларға 3D-сканерлеу қызметтерін ұсынады. Жұмыста Artec компаниясының Австралиядағы өкілі Qubic жеткізетін қуатты қол сканері Artec Leo қолданылады.

Бастапқыда тапсырыс беруші қосалқы бөлшектерді 3D-басып шығару мүмкіндігін қарастырғысы келді. Алайда қысымға төзімділікке, сұйықтық динамикасына және тозуға төзімділікке қойылатын талаптарға байланысты 3D-басып шығару жарамсыз екені анықталды. Сонда Forma 3D басқа шешім ұсынды: уақыт сынынан өткен технологиялармен бөлшектер жасауға мүмкіндік беретін CAD-модельдерді әзірлеу.

Artec Leo көмегімен кері инженерия

Сорғының жұмыс дөңгелектерінің геометриясы көбіне күрделі болады: олардың ішінде арналар мен иілген қалақшалар бар, сондықтан оларды цифрлық форматқа көшіру қиын. Жылтыр беттер де 3D-сканерлерге кедергі келтіреді: сканерлеу кезінде олар лазер сәулесін шағылыстырады. Ал қолмен модельдеу көп уақыт алады әрі қателікке бейім. Қалақшалардың ішкі пішіндері өнімділік үшін аса маңызды болғандықтан, Condamine-ге әмбебап әрі сенімді шешім қажет болды.

Сондықтан компания Artec Leo сканерін таңдады. Бұл — ноутбукке қоспай-ақ шағын шеберханаларда жұмыс істеуге қолайлы сымсыз, дербес 3D-сканер. Құрылғы нақты уақыт режимінде кері байланыс беріп, сканерлеу сапасы мен нысанның толық қамтылғанын тексеруге мүмкіндік береді. Бұл кері инженерияда аса маңызды, өйткені күрделі геометриядағы олқылықтар көбіне деректерді өңдеу кезінде ғана байқалады.

image

Forma 3D компаниясы Condamine Drilling үшін цифрлық форматқа көшірген жұмыс дөңгелектері бөлшектерінің топтамасы

Тапсырысты алған Forma 3D мамандары бірнеше жұмыс дөңгелегін сканерлеу үшін Leo құрылғысын қолданды. Олар үстел үстіндегі 3D-сканерге сыймас еді, ал сымсыз Leo сканерін әртүрлі көлемдегі бөлшектердің айналасында еркін қозғалтуға болатын. Жылдамдық та маңызды болды: секундына 35 миллион нүкте түсіретін сканер барлық бөлшекті ұзақ баптау мен калибрлеусіз жылдам сканерледі.

«Artec Leo құрылғысының дәлдігі мен ажыратымдылығы бұл өлшемдегі бөлшектерге сай болды. Олар үстел үстіндегі сканерді қайта-қайта жылжытуды қажет ететіндей үлкен, ал Leo әр бөлшекті аз ғана сканмен тиімді цифрлық форматқа көшіре алатындай шағын еді, — деп түсіндіреді Forma 3D маманы Гарри Тайг. — Leo жылдамдығының практикалық маңызы да болды. Әртүрлі өлшемдегі бірнеше жұмыс дөңгелегін сканерлеуіміз керек еді, сондықтан тиімді әрі қайталанатын жұмыс үдерісі қажет болды».

3D-сканерлеуден құюға дейін

Сканерлеуден кейін деректер Artec Studio бағдарламасында өңделді. Барлық кадрды дәл біріктіріп, біртұтас нүктелер бұлтын жасау үшін Global Registration функциясы қолданылды. Содан соң Sharp Fusion алгоритмінің көмегімен деректер егжей-тегжейі жоғары тұйық торға біріктірілді. Жұмыс дөңгелегінің барлық бетін қамтыған цифрлық модельдің дәлдігі соншалық, оны бірден SOLIDWORKS бағдарламасында қайта өңдеуге жіберуге болатын еді.

image

Artec Studio бағдарламасындағы жұмыс дөңгелегінің сканерленген бөлшегі

Condamine Drilling дайын жобаларды тікелей құю өндірісіне жіберіп, онда жұмыс дөңгелектерін қоладан құйдырды. Кейін шикі құймалар механикалық өңдеуден және соңғы әрлеуден өтіп, қайтадан пайдалануға берілді. Forma 3D компаниясына жүгінгенге дейін Condamine-де өндірістен алынған істен шыққан бөлшектерді алмастырудың тиімді жолы болмады. Дәстүрлі әдістердің бәрі тығырыққа тірелді, ал сканерлеп, кейін CAD-модель жасау жалғыз шешім болды.

Нәтижесінде Artec 3D-сканерлеуі жылдамдық, дәлдік, қайталанымдылық және қолжетімділік тұрғысынан жұмыс үдерісін түбегейлі өзгертті. Енді бүкіл жұмыс қолмен өлшеп, сызбаны қайта жасаумен салыстырғанда әлдеқайда аз уақыт алады әрі өлшемдердің дәлдігіне көбірек сенім береді. Leo қосалқы бөлшектер қажет болған сайын жеткізушілерге жіберуге болатын дәл цифрлық көшірмелер жасайды.

Ескірген жабдыққа арналған ауқымын кеңейтуге болатын шешім

Бұл жоба Forma 3D компаниясының өнеркәсіптік ортада сканерлеуден CAD-модель жасауға дейінгі жұмыс үдерісінің тиімділігін растады және оның инвестицияны қысқа мерзімде ақтай алатынын көрсетті. Дайын 3D-модельді инженерлердің қатысуынсыз-ақ тікелей жеткізушіге беруге болады. Қосалқы бөлшектер қолжетімсіз болған басқа да көптеген салада осы үдерісті қайталауға болады.

image

Condamine компаниясының жұмыс дөңгелектері бөлшектеріндегі күрделі беттердің мысалы

«Condamine Drilling тап болған мәселе тек осы компанияға ғана тән емес, — деп қорытындылады Тайг. — Бастапқы сызбалары жоғалған, өндірушілері енді жоқ немесе қосалқы бөлшектерді жеткізу тізбектері толық тоқтаған ескі машиналар мен жүйелер өте көп. 3D-сканерлеу мен кері инженерия — практикалық әрі ауқымын кеңейтуге болатын шешім».

Бұрын цифрлық жобалау өз инженерлік және өндірістік мүмкіндіктері бар ұйымдарға ғана қолжетімді еді. Қазір кез келген адам дерлік 3D-сканерлеуді пайдаланып, тәжірибеде қолдануға болатын сенімді деректер ала алады. Forma 3D компаниясы өз қызметтерінің тау-кен өнеркәсібінде, ауыл шаруашылығында, су инфрақұрылымында және ауыр өнеркәсіпте — күрделі кері инженерия қажет болатын барлық жобада — әлеуеті зор деп санайды.

Түпнұсқа жабдықты жеткізу тізбектері бұзылғанда, жабдықтың пайдалану мерзімі құжаттамасының сақталу мерзімінен асып кеткенде немесе бөлшектер қолжетімсіз болғанда, 3D-сканерлеу қолданыстағы құрылымдарды цифрлық форматқа көшіріп, оларды әрі қарай дамытуға өте қолайлы. Бұл технология ескі жабдықты пайдаланатындардың бәріне пайдалы. Condamine — қосалқы бөлшектердің цифрлық қорын жасаған көптеген компанияның бірі ғана, әрі соңғысы емес.